ई-पिक पाहणीसाठी १५ जानेवारीपर्यंत नोंदणी करा; जिल्हाधिकारी डॉ. किरण पाटील यांचे आवाहन
बुलढाणा,(जिमाका): राज्य शासनाच्या महत्वाकांक्षी प्रकल्प ई-पिक पाहणीची सुरुवात दि. १ डिसेंबरपासून सुरू झाला आहे. यात सातबारावर पिकपेरा स्वतः शेतकऱ्यांनी अॅन्ड्राईड फोनद्वारे नोंदणी करावी लागणार आहे. शेतकरीस्तरावर पिक पाहणी करण्यासाठी अंतिम दि. १५ जानेवारी २०२५ पर्यंत आहे. त्याअनुषंगाने सर्व शेतकरी बांधवांनी विहित मुदतीत आपल्या पीकांची नोंदणी करून घ्यावी, असे आवाहन जिल्हाधिकारी किरण पाटील यांनी केली आहे.
रब्बी हंगामी २०२४ ई-पिक पाहणी डिजिटल क्रॉप सर्वेअंतर्गत बुलढाणा जिल्ह्यात आजरोजी पर्यंत ७ लाख ५६ हजार ५३५ हे. आर. क्षेत्रापैकी १ लाख ४६ हजार ५३२.०४ हे. आर क्षेत्रावर, तसेच एकूण ८ लक्ष ३६ हजार ०३३ पिक पाहणी करावयाच्या खातेदारापैकी १४१९८९ प्लॉटवर सबंधित शेतकऱ्यांनी आपल्या पीकांची ई-पीक पाहणी डिसीएस व्हर्जन ३.० या मोबाईल अॅप द्वारे आपल्या सातबारा वर नोंदणी केलेली आहे. आजवर बुलढाणा जिल्ह्यात डिजटल क्रॉप सर्वे अंतर्गत ई पीक पाहणीची नोंदणी १९.३७ टक्के क्षेत्रावर झोलेली आहे. उर्वरित क्षेत्रावर सर्व शेतकरी बांधावांना ई- पीक पाहणी अॅपद्वारे पीकांची नोंदणी करण्याचे आवाहन करण्यात येत आहे.
पीक पाहणीची नोंदणी ई-पीक पाहणी व्हर्जन ३.० या मोबाईल अॅपद्वारे करतांना अॅन्ड्रॉईड फोन आवश्यक आहे. सदर अॅप गूगल क्रोम अपडेट करून मोबाईलमध्ये इन्स्टॉल करून घ्यावे. ई पीक पाहणी अॅपद्वारे शेतकरी बांधावर जावुन पीकांची नोंदणी करून माहिती अपलोड करावी. सदर कामी संबंधीत शेतकऱ्याजवळ मोबाईल उपलब्ध नसल्यास, संबंधीत गावाचे तलाठी, कोतवाल तसेच कॉमन सर्व्हिस सेंटर यांची मदत घेवून आपल्या पीकांची नोंदणी ई
पिक पाहणी अॅप द्वारे करून घेण्यात यावी. सदर अॅपविषयी काही अडचण असल्यास संबंधीत गावाचे तलाठी तसेच कॉमन सर्व्हिस सेंटर, आपल्या गावातील डिसीएसकरिता नियुक्त सहाय्यक यांची मदत घ्यावी. ई पीक पाहणी द्वारे पीकांची नोंदणी न केल्यास आपल्या सातबारा वर पीक पेरा कोरा राहीन. जो नंतर भरता येत नाही त्यामूळे पीक विमा व इतर शासकीय अनुदान व लाभ मिळविण्यास अडचण निर्माण होईल, अवेळी पाऊस किंवा इतर नैसर्गीक आपत्ती या बाबत पिक विमा मिळण्यासाठी सातबारा वर अचूक पीक नोंद असणे आवश्यक आहे.